Секое утро пред да започнеме со нашите дневни обврски и секојдневни задачи , го погледнуваме надвор времето или пак и веруваме на временската прогноза и убаво се подготвуваме за денот кој е пред нас. Во нашите подготовки често се случува да се стресеме од студ, да го зграпчиме нашето палто и брзаме што побрзо да стигнеме на нашето работно место.

Секој од нас во својот дом сака да се чувствува најудобно, особено во оние ладни денови кога треба температурата во домот да биде пријатна и стабилна. Токму заради таа причина, веројатно на големо се размислува за тоа како да се стоплиме и како најефикасно да се справиме со греењето и оваа сезона. Како што за изминатата летна сезона се подготвувавме на најразлични начии, така и за оваа сезона не чекаат соодветни подготовки и прилагодувања.

Уште пред да почнеме да размислуваме за тоа како да се грееме и кое грејно тело ќе ги задоволи нашите потреби, мора да си поставиме неколку прашања:

* Дали имаме добра изолација во просторот за кој се подготвуваме да поставуваме грејно тело?
* Дали сме задоволни од нашето постоечко греење или можеби сакаме да смениме нешто?
* Со колкав простор располагаме и колку тоа игра улога во нашиот избор?
* Со колку средства располагаме и доколку сме ограничени, како да го направиме најдобриот избор?

Една од најзначајните работи и можеби прва на која треба да се размислува кога е во прашање грејната сезона, е изолацијата на просторот кој го загреваме. За да можеме да споредуваме еден систем на греење со друг, потребно е објектите да имаат иста изолација и приближно ист квалитет на прозорци и врати. Добро изолираните простории ја зголемуваат искористеноста на топлинската енергија дури за 30%. Ова секако е од големо значење кога на крајот на месецот ни пристига сметката за електрична енергија или пак кога правиме калкулации за потрошената струја, потрошените пари и загреаниот простор.

Доколку до сега сме се грееле на парно, на котел на струја кој најчесто се користи за помали простории, или пак на котел на цврсто гориво за поголеми простории, може да размислуваме за можноста постоечкиот котел да го преименуваме за користење на пелети. Овој начин на греење е еколошки, ефикасен и се почесто се користи. Во тој случај може да се купи горилник на пелети и истиот да се постави на котелот. Доколку решиме да останеме на постоечките радијатори со кои сме се грееле порано, ќе треба да се посвети внимание на радијаторите и радијаторските вентили. Тоа значи да се внимава и провери дали истите се исчистени од најразличен отпад, кој може да ја намали ефикасноста на греењето и да го затне системот.

На сето ова се надоврзуваме и со просторот со кој располагаме и кој треба да го загрееме. Секако дека не е исто кога загреваме еден дел од нашиот дом, или пак еден спрат од нашата куќа, а од друга страна цел отворен простор од повеќе од 100м2, каде топлината таканаречено “бега” низ целиот простор. За таа цел најдобро е да се направи добра пресметка на потрошувачката на повеќе типови грејни тела, согласно просторот и да се одбере најефикасното решение.

Бидејќи не ретко се случува нашиот избор на уред за греење да биде зависен од сумата на пари со кој располагаме, ќе ви наведеме некои карактеристики на грејните тела според кои можете да го направите вашиот вистински избор. Со оглед на тоа што ова решение кое го носиме треба да биде со голема исплатливост и на долг рок, мора да ги земеме во предвид и цените на енергенсите. Цената на нафтата и плинот се во постојан пораст, затоа мора да се размилси пред да се реши на загревање со овие енергенси. За разлика од нив, пелетите се економско и еколошки исплатливо решение, не бараат дополнителна грижа околу котелот и се надополнуваат на секои 2-3 дена . Со самото тоа обврските со овој начин на греење ни се намалени и ни останува повеќе слободно време.

Ова се само дел од нештата на кои теба да се обрне внимание кога се подготвувате за грејната сезона, во некои од наредните постови ќе добиете уште некои информации кои се надеваме дека би ви биле од корист.